DUOLAN 500 ka mga displaced students nga naapektuhan sa pagsira sa mga offsite campuses sa JHCSC ang nakadawat na sa ilang P10K nga financial assistance gikan sa kagamhanang probinsyal kagahapong adlawa adlawng Huwebes, Pebrero 15 sa JHCSC Main Campus, San Miguel, Zamboanga del Sur.
Ang mga student beneficiaries nagagikan sa lungsod sa Dimataling, Pitogo, Bayog, Guipos, San Pablo ug Vincenzo Sagun. Kahinumduman nga sa nakalabayng bulan sa Disyembre nadawat na sa unang batch ang ilang tabang pinansyal.
Gipangunahan ni Gov. Victor J. Yu ug Cong. Victoria YU ang pag-apod apod sa maong ayudang pinansyal kauban si San Miguel Mayor Ex D. Ocapan, JHCSC President Dr. Edgardo H. Rosales ug uban pang mga opisyales sa nasangpit nga kolehiyo.
Gibutyag ni 2nd District Congresswoman Victoria Yu nga ang P5k niini ang naggikan sa panudlanan sa Provincial Government samtang ang laing P5k niini ang naggikan sa pundo sa Kongreso ug ang maong tabang pinansyal ang madawat kada semester sa maong mga studyante. Dugang pa niya nga ang 30 milyones nga budget sa kongreso ang gihurot niya paghatag para sa edukasyon sa lalawigan.